Nag-viral noong August 18, 2024, ang isang video na ini-upload ng X (formerly Twitter) user na si Abhishek, isang Indian researcher at journalist. Ang nasabing video ay kuha mula sa isang smartphone shop sa India at tampok ang isang binatilyong nag-hunger strike ng tatlong araw upang pilitin ang kanyang ina na bilhan siya ng bagong iPhone.
Sa panayam ni Abhishek sa mag-ina, ibinahagi ng ina na nagtatrabaho siya bilang nagtitinda ng mga bulaklak sa labas ng temple upang matustusan ang kanilang pangangailangan. Kitang-kita ang hirap sa kanyang mukha habang sinasabi niyang napilitang pagbigyan ang anak sa kabila ng kanilang hirap sa buhay. “I sell flowers outside a temple, and my son hasn’t eaten anything in three days because he wanted an iPhone for himself,” pahayag ng ina.
Pumayag na ang ina at ipinambili ng iPhone ang naipon niyang pera, ngunit pinaalalahanan niya ang anak na kailangang bayaran nito ang nagastos mula sa kanyang sariling kita. Masaya man ang ina sa tuwa ng anak sa bagong gadget, nais pa rin niyang matutunan nitong magsikap at mag-ipon.
Sa video, makikita ang binatilyo na masayang-masaya habang tinatanggap ang iPhone, at libre pang binigyan ng earphones mula sa shop. Matapos ang video, umani ito ng 3.1M views, 2.3K comments, 15K reactions, at 4.9K shares.
Maraming netizens ang nagpakita ng simpatya sa ina, na pinuna ang pagiging insensitive ng anak. Ayon sa ilang komento, ginamit ng binatilyo ang emotional blackmail para mapilit ang ina, na nagtatrabaho nang husto bilang isang flower vendor. Anila, nakikita sa mukha ng ina ang pagod at hirap dulot ng emotional at financial pressure mula sa anak.
Dagdag pa ng isang netizen, “Spending this much money on a phone when you don’t work, while your mother toiled hard by selling flowers, doesn’t make any sense.” Marami ang sumang-ayon, sinasabing ang mga ganitong anak ay walang respeto at pananagutan sa kanilang mga magulang.
source from pep. ph
